Kagiira Skills Development Center, Agriculture With New SkillsEKISHENGYE KIRUNGI NUBWO BUSHWERE BURUNGI:
Obunyakare wa Ankole
Nekya Elia
976
Orwakabiri 2020-04-21
Iwe ngirira omuriisa w'omwanya gutakozire gwijwire ekishaka kingi kikwateine, kushanga nawe agumize ati ninyenda kugomora ente zangye, n'amate nkanyise!
Mpuririzayo ogwo nyamuhingi oshitami omukishambu agumize ati enjura kuri netonya eti ahansi nkabyara embibo yangye!
Mbwenu shi ogwo wari mweshezi obara ente neta omunwa omubwato akagitera we naija ata akaceceba omukasheeshe nekyanzi kuza kukama egyo nte?
Ebyo byoona ebya eruguru ninka abo abari omu bushwere, wareeba ekishengye kyawe otakifaho, otakayetegurira ebirungi by'obushwere burungi omuka yawe, ogahwe!
1. Entongane zitware omukishengye:
Imwe embu y'okutonganira omumaisho y'abaana banyu nari abagyenyi, muze omukishengye kyanyu, mugwisize akagwe okwo, mwaheza mugarukye omu muryango. Manya abaana bo tibaine rubaju kandi tibashemeraire kumanya ebyanyu kureka benda rukundo yanyu, nikyo kimwe n'abagyenyi.
2. Obuyonjo:
Riga ahakusimura ninga okugorera amashuka byonka. Manya obwato bw'obuyonjo niburetera ente kunywa ameizi zikagahaga.
Kwerikutamu omunwa ebitokoozi bikagiteera e ahamunwa nehunga neyeribatira owa nanka nari nefa agaganywa negagyegyena etagakunzire.
3. Emyesherere egyo bantumwe:
br> Eshi omweshezi mubi narisya! Reero ayeyatira ameizi, reero atuura ameizi omubwato ente ikuuka zikiine eiruho, reero ngugwo nashoreza, nafubeera, ngw'obwo ayenda kuhamira, eshimwe!
Mugyezeho kushoborekyerwa nyaburamwe ente nitahana nyencakare nimubura eky'okukama niyo njara etahweire! Basheijamwe mukitekatekyeho!
4. Okukamwa kubi:
Riga aha mukami mubi orikwekamira enkokora ikajuba! Nabwo akate kukamwa nikagyendera ahamboha, nikateera ihembe okwatiire, nikatonda mukamako, nikateera emigyere, k'otubere tukye, nako ga nikarisya! Hoona bwo oyenda kukamira omugore ifuro taritwara enuniira! Bakazimwe mukitekatekyeho!
5. Manya eshaha z'okweteisa:
Iwe otafayo ngu abantu baruho kutina kweteisiza omukazi nari omusheija wawe! Reeba gye aho ente zaheza kukuuka, omweteisize!
Kwonka zibe zagahaga kwo buzima! Obwo omutima niguba gugwirwe gye, nuho oraretere ekitenso kyawe. Baitu bitari oby'okushanga aho omwihangwe aine obusharirwa bw'amabanja, manya fiizi z'abaana, reka reka otagyeza, iwe bara eshaha ezo zakuuka!
6. Omugaju:
Ogira ngu pafuyuumu egyo tegira mugasho ahamuntu? Manya n'omukishegye neyendwa. Manyise ngu gira ako akasya akuwayongyeraho bantumwe! Manya akarabo niketengwa otatiina emyaka yimwahitsya!
Iwe mbahi bakagikuzibira obwogiramutsya ori ow'aharubaju?
Bwo shi wamwebaza ente nikuuka nibakuteera? Nangwa wayenda nohinduraho tikiragiro ngu besheza bumosho nari buryo yonka!
Omugaju ogwo niguyamba munonga kutaho empinduka okashisha oti ekishengye kyanyu mwakitahamu busya kandi nubwo BUSHWERE BURUNGI buzima.
7. Okuguunga:
Reero wareeba Byakaranga yeinika ebitsya ekayeyinamira, eka kuba amatu omunwa ekaguta ahansi, ekabungurirwa ekanga kurya ekehereera, ekanga kunywa obwo etwireho kwesherwa, okimanye ngu haine akabi karuho!
Wareeba Ruhogo efubire nerebera omunkondo, enshumba yayo ekagirabaho Ruhogo rwangye runkwemanyira ekareeba obuseeri, ekatukura ameisho! Ai nga bakampa! Okimanye ngu haine akiruho mazima!
Embu y'okugyema Byakaranga kunywa nari Ruhogo okagijukirira oti obufeera ebwihirehi, banza oyebuze enshonga neha!
Manya nakutera omugongo obumwe arweire, afubire, nari obundi arihire nayenda kuhumuraho baitu iwe oyenda kugyemaho nari orahukiriza kuza kweribatira obuseeri obwo enshonga neriga ahariwe! Mushutame mukiganireho omukishengye kyanyu.
8. Mwetware bantumwe:
Ngirirayo kuhanantuka oku n'ekyanzi ente etakagabire! Manya babanza kubarabaisa, nangwa n'enshumba ndebanza necundana n'enimi nkeira eyemerera.
Hoona kaba owawe, kamuba omwanyu, orahukibwaki mukamawe? Tiwe obarabaisa ekagaba okakama omushumba gw'abashaija?
Baitu hoona noitwa empumo orugyendo nirukitandika tukwo wagyenda wenka nugyenzi wawe okamutsigaho! Manya Byakaranga ndikafa nyenka neba yatega kugatyora eyecura omweshezi natsyamuka nguwe yaherize kweshera, eshimwe!
9. Mubuuze:
Manya tiharuho omanya byoona, kandi buri muntu atiganda omukanwa ka mugyenziwe. Tom Isingoma Mwesiga nimbehanangiriza kubuza nyaburamwe!
Mwareba ekishengye kyafunda, mubuze abandi okubatwarize. Nibaija kubombekyera.
10. Ruhanga mutarimwebwa:
Manya obushwere burungi buhabwa Ruhanga. Mushabe hamwe, mumwete burizooba oba mumushana oba mumwirima agume abombekire buzima.
Iwe wareeba yakokootsa ahameisho mwete omukishengye mushabe Ruhanga naija kuhagorera ahameisho mpaho, aryata!
Ruhanga abempere omugisha kandi Mwebare kushoma ebimbahandikira obutoosha.
Byahandikwa : Eng. Tom Isingoma Mwesiga, +256-703-072203 Whatsap, email:tomisingoma2@gmail.com}
Huumura Tuganiire
Abakatoriki (2) Africa (3) Agekibarukiraho (43) Akaruuru 2011 (1) Akaruuru 2021 (26) Amagara (2) Amaka (5) Amakuru (538) America (1) Ebaruha (8) Ebirango (8) Eizooba Eri (5) Ekyanga Kyawe (9) Enfumu (3) Enganda (2) Esente (1) Haaya (1) Obugabe (8) Obutare (4) Okwiruka (2) Omuntu Waawe (12) Omupiira (24) Omushaho (1) Puriyamare (2) Ruhuuta (18) Senyiga Ya Corona (29)