Kagiira Skills Development Center, Agriculture With New SkillsEKITEBYO KY'ABAAKARE- ICHULI EKICWEKA 1 (WAKAAME). Shoma n'omwana wawe omuka
Ichuli na Empisi
Nekya Google
1036
Orwakashatu 2020-04-22
ICHULI EKICWEKA 1
Obwira niira hakaba hariho ekanyamaishwa kakye k'obwengye karikweta Ichuli. Ichuli akaba naakunda kurya enyama konka akaba atiine maani garikubaasa kwita enyamaishwa yoona kutuunga ekyokurya nahabwekyo ekaba ekira kuba eine enjara. Eizooba rimwe akashutama yateeekateeka akakodyo. Naagwa haakiri akaba naamanya okuyaakutuunga akanyama.
Ichuli akaba naamanya ngu hariho Empisi eyabeire etuura hare munoonga. Akaba naayenda kubuuza omwami Empisi kumuyaamba kutuunga akanyama. Akaba aine kutaambura hare hare kuraba omurubira rukwateine. Akaba naayerariikirira ngu enyamaishwa eziindi nizibaasa kumureeba kandi zibaasa kwenda kumurya. Akagyenda mporaampora erikureebareeba embaju zoona atakarabiremu mpaka omubwere. Akaba atiinire munoonga. Akareeba enyamaishwa nyiingyi munoonga omumuhaanda. Akaba naayenda kukwata zimwe aharizo aziite atuunge ekyokurya konka ijuka ngu akaba ari kakye munoonga Kandi atiine maani garikubaasa kwita enyamaishwa yoona aharizo. Akaba naamanya ngu omwami mpisi naaza kumuyaamba kutuunga enyama nuungi munoonga y'okurya. Akataandika kurahuka kuraba omukibira yaahika ahaanju y'omwami mpisi.
Kuyahikireyo, yaagambira omwami mpisi ati ninyeenda kutuunga ekyokurya erizooba, nooza kunyaamba?
Omwami mpisi agarukamu ati, nekiteekateeko kiruungi munoonga! Naanye naaba ninyeenda kutuunga enyama erizooba, nkuyaambe nta? Ichuli akashemererwa, yairira haihi n'omwami mpisi yaamugura ati; hariho enyamaishwa nyiingyi aharushozi oru. Kutwakugyenda ahamutwe egi shaaha, nitubaasa kwitayo emwe. Reka tugyende tureebe ekitwakubaasa kutuunga.
Ichuli owabeire naamanya omuhanda yayebeembera. Omukaire kakye, yaayemerera yaagira "ogu nigwo muhaanda ahizirikuba niziraba zirikushuuma".
Ati hati iwe guma aha, niinza kugyeenda eruguru nzijuumbure zishuume. Konka oine kuhurikiriza nokwegyendesereza munoonga. Kworaahurire eibaare ryaagwa, omanye ngu enyamaishwa yaarishaamba, ahonaaho, yegama aharubaju, kworaahurire ekisherebuzo, nooza kumanya ngu enyamaishwa eriyo neeyija, hiindura okutu kwawe kwabumosho, oyemerere omumuhaanda ogitaange. Wayetegyereza? Omwami mpisi agarukamu ngu yaayetegyereza.
Atyo Ichuli ateemba ahamutwe gw'orushozi, asiindika ekibaare kihaango munoonga ekyaakozire omusiindo gwamaani. Omwami mpisi ahurira amabaare nigagwa ayiruka ayegama aharubaju. Ichuli aheenda obuti kukora ekisherebuzo atyo arekyera munoonga akabaare kakye kashuuma.
Omwami mpisi ayemerera omumuhaanda, atayo ategayo okutukwe kwabumosho. Eibaare rityo rimushekura omutwe agwa ahaansi afa.
Ichuli atyo airuka arikushuuma orushozi arikubuuza "omwami mpisi orahi? Enyamaishwa erahi? Wagyiita? Konka bambe omwami mpisi akaba atirikugarukamu ahakuba akaba yaafiire.
"Omusiru mpisi tarikumanya obukoryo bwa Ichuli" Obwe Ichuli arikugaamba n'okwesiima, nabwayima atyo aziinga engata, ayekorera Empisi efiire agitwara omunju ye agirya.
Shoma n'ekicweka kyakabiri kya Ichuli (Ahabwenki ayetaantara engwe!)
Huumura Tuganiire
Abakatoriki (2) Africa (3) Agekibarukiraho (43) Akaruuru 2011 (1) Akaruuru 2021 (26) Amagara (2) Amaka (5) Amakuru (535) America (1) Ebaruha (8) Ebirango (8) Eizooba Eri (5) Ekyanga Kyawe (9) Enfumu (3) Enganda (2) Esente (1) Haaya (1) Obugabe (8) Obutare (4) Okwiruka (2) Omuntu Waawe (12) Omupiira (24) Omushaho (1) Puriyamare (2) Ruhuuta (18) Senyiga Ya Corona (29)