Kagiira Skills Development Center, Agriculture With New SkillsEBYAFAAYO BYE NYANJA YA NYABIHOKO OMURI NTUNGAMO
Omushaki weitu omuri Ankole
Nekya Andrew owa Ankole Reality Tv Ankole
1449
Orwakashatu 2020-04-29
Enyanja ya Nyabihoko neshangwa omu disiturikiti ya Ntungamo, kiromita zirikwingana 372 waba nooruga Kampala. Enyanja egi neebaganwa egoomborora ibiri, eya Nyabihoko nana Bwongyera(zoona ziri omw'ishaza rya Kajara) na Rubaare omw'ishaza rya Rushenyi.
Obwiranira, hakaba hariho omushaija arikwetwa Mutuumo. Akaba naatuura aha mwanya muhango gw'okuriisizamu, nikyo kyamureteire kuba omwe ahabariisa b'ekitiinisa omubwire bwabo.
Omu Itsyo rye, hakaba harimu ente erikwetwa Rujeru(erikwera yoona), eyiyabeire naakunda munoonga. Erizooba rimwe, Rujeru erwara omubwire nibwo bumwe obu Mutuumo yabeire naayenda kuza Omubwera omuri Nshenyi(obwahati Rwanda) kureeba munywaniwe owabeire amuraganiise enumi y'okwemesa ejigija ze kwenda ngu atuungye enyena za kuroosi. Atakagyenzire, akabanza yaaha Rujeru emibazi yaagaruka yaarabura ngu Rujeru kuyaakugumizamu ekafa, hatakaagira n'omwe owagirya kureka bagiziike. Abariisa beikirizana na Mutuumo atyo Mutuumo agyenda Nshenyi.
Bwanyima y'ebiro bikye, Rujeru efa, abariisa babuuza muka Mutuumo ngu mazima bakuziika egyo nyama yoona. Abariisa bo bakamanya ngu obwe nibwo bwire bwabo bw'okujaguza. Eka yoona oteiremu nanomukazi wa Mutuumo n'abaana baateka obugyenyi ebiro ebyo byoona kandi nakakye akabeire katsigaireho ahanyama ya Rujeru, baakakara.
Ahakiro kya kashatu, shaaha mwenda z'ekiro nkabureijo aimuka kuchunda, kuyabeire bambe ari ahamurimo gwe, ahuririra ebisiika by'enju yaabo nibigwa omumaizi haza tafayo we agumizamu naacunda. Bwanyima kuza kwetegyereza, ashaanga ensi eyabiire emwetoreire yoona yacwekire ameizi, akaba ari omwe weenka owabiire atsigaireho. Ameizi gakamumira ahamuheru obwe arikucura. Omukasheeshe, bury'omwe akataangara kureeba itaka rya Mutuumo ryoona ryijwire amaizi
Omukugaruka kwa Mutuumo, amakuru gakamushanga yaahika Kyabukuju, obwahati erikwetwa Byasha, waruga kakye Rubaare orikuza kuhika ahanyanja. Obwe ari ahankoni ye, enyima y'enimi, akaba atarikubaasa kwikiriza amakuru ago mpaka ahu yayerebeireho n'age.
Kuyaherize kureeba eitaka rye ryoona riryamaizi akashutama ahansi nokutangaara kwingyi ahamwanya gurikwetwa Muhororo, aheibaare rihaango, aharubaju rw'enyanja arikureeba n'enaku nyingyi n'obusaasi. Nabwanyima y'eshaaha nkye arikurira, akasharamu kugyenda kutaayayira munywaniwe arikukirayo owubabeire nibeeta Mwamba, nawe omuriisa w'ente, owabiire naatuura Kaakyera omuri kooki obwahati erikwetwa Rakai disiturikiti.
Munywaniwe kuyaamureebire, akamanyiraho ngu hariho ekitari kirungyi, konka Mutuumo tihaine kiyaagambire. Kumara esaande nyingyi, akaanga kunywa amate agaabiire gamuheebwa, konka ahabwa rukundo y'ente ze, Mutuumo akamushaba kwariisa ente ze kumara ebiro bikye.
Mwamba we akasharamu kumuha enyena ahakuba zo zikaba nizigaruka shaaha itaano kuza omurugo. Mwamba akaba atarikwenda Mutuumo kwabonaabona ahabw'omushana gwa Kaakyera. Buri kasheeshe, akaba agyenda kuriisa enyena, akaba ashutama aheibaare areeba nizirya atyo aguma naayegambira ebigambo "byaaba byababyo konka tibyo" obwe arikumanyisa ente ze eziyafeerirwe.
Beijukuru ba Mwamba bakaba bahurira Mutuumo arikuguma naagamba ebigambo nibyo bimwe, mpaka , konka tibarabyetegyeriize batyo nikwe kweta ishenkuru bo owagweriire Mutuumo atyo akamuhurira naagamba ebigambo nibyo bimwe.
Akeitwa enaku nikwe kugyema munywaniwe kwamugaambira ekyabeire nikimuteganisa munoonga kuhika kumureebesa enaku egyo. Atyo Mutuumo amweta kubaza aharugyendo bakaza Nyabihoko bakaza kureeba ekyamunakuhiize. Mwamba tarariinzire, akwata eicumu rye batyo bagyenda.
Kubahikire Nyabihoko, Mwamba akaburwa ebigambo. Bakaraara Rukomo ahamwanya guribarikweta Kyamukooko (ahanshoonda niingwa y'enyanja), obwe bari aho, Mutuumo akagyezaho kweterebura aharusiinga rw'enyanja kugwamu konka munywaniwe amubeihabeiha kubagarukayo hamwe Kaakyera.
Bwanyima y'ebiro bikye, bahika Kaakyera nkabureijo ahabigyere aho Mwamba ayeta ekyaaro kyoona ahatereko. Akiita ente ye y'enguumba eiyabeire naakunda munoonga eiyabeire neeyetwa bihogo, batyo ekyaaro kyoona kikora obugyenyi.
Bury'omwe kuyaaherize kugyenda, Mwamba agambira Mutuumo ngu bagyende kwibira hamwe. Obwe barikwibira, kubahikire ahare munoonga, baakwatana emikono batyo beenagayo bafa bombi.
Omwe naatangaara ngu egi akaba ari rukuundoki! Nooha owakufeera munywaniwe omuunaku? Ekikorwa eki kikaba kitari kyaaburiijo akyaretiire nabany'Ankole biihamu ebigambo ngu; "Korahurire ngu nkukuunda nkukuunde ogwa Mwamba?"
Nyabihoko hati nomwanya murungi gw'oburaambuzi neiwe oguwakukuunda obwe beitu waheza kugureeba.
Byahandikwa Andrew owa facebook page eya Ankole Reality Tv
Huumura Tuganiire
Abakatoriki (2) Africa (3) Agekibarukiraho (43) Akaruuru 2011 (1) Akaruuru 2021 (26) Amagara (2) Amaka (5) Amakuru (535) America (1) Ebaruha (8) Ebirango (8) Eizooba Eri (5) Ekyanga Kyawe (9) Enfumu (3) Enganda (2) Esente (1) Haaya (1) Obugabe (8) Obutare (4) Okwiruka (2) Omuntu Waawe (12) Omupiira (24) Omushaho (1) Puriyamare (2) Ruhuuta (18) Senyiga Ya Corona (29)