Kagiira Skills Development Center, Agriculture With New SkillsNYEETA N'OBUHABUZI OBU
Byahandikwa Byaruhanga owa Ndi Omunya Nkore
Nekya Byaruhanga
505
Orwamukaaga 2020-05-02
Hariho omuntu tubaire nitugaaniira yantebeza omwishiki owashweirwe atarikumanya kugoya. Ku baamugizire ngu agoye oburo bw'amaizi, obwo munyaanya aizire kumukoza omu mahega, yaateeka ekigyegye - yaarira! Ishezaara, Nyinazaara, abaramu, abaramu-kazi, iba kitobobo n'eka yoona engaro baazita aha munwa!
Mbwenu ka ngire eki naahabura abaana baitu, haza omu rurimi rwaitu! (Eky'orurimi ngyendereire kubahiga, nangu naimwe abamwe abakuru, ngu n'obu muraayegye ezindi, kwonka muteebwa orurimi rwaitu...ni rurungi munonga, kandi n'orw'omuhendo!).
Ensi egi ni ishungisa! Teiniire ifubo abeeremwa n'abatarikumanya. Okukora n'okushoma tubikwatise amaani. N'ebikwato bikuru ahabw'entunguuka y'omuntu, aka, ekyaaro, n'eihanga. Hati ka nte esira aha ky'okukora.
Hariho eki abaabiso beeta 'kahega'. Iwe obure kwega emirimo, orere engaro, kahega eryakureeta! Obunaku buryahika ebi wayangire kwega byetengwe nari bikushabwe.
Gira obwengye. Yega emirimo, nyencakare oryayesiima. Ahu nyoko na sho bariba batakiri, oryayebeisaho. Eki abazaire baawe barikukukorera tikiriija kukuyamba ku oriba otakibaine. Yega kwekorera n'emikono yaawe, iwe ahabwawe!
Abanyankore bakaba bagamba okukura buroro. Eki nikimanyisa ebintu bibiri:
1. Omuntu kukura atarikumanya mirimo y'okumubeisaho: okurya, okurinda ebye, obwecumi, n'ebindi.
2. Okuba 'eryo' nari okukorera 'eryo'! Omuntu otari mufu w'omutima akaba ayerinda okugambira eryo, okuriira eryo, okushutamira eryo, okujwarira eryo, n'ebindi. Ekyo nikimanyisa ngu eki yaabaire aza kukora nari kugamba akaba abanza akiteekateekaho gye, obwo arikwenda ngu ataza omu kabi nari akakatamu abandi.
Mbwenu, waba otarikwenda kunyeeta buroro, okore ki?
Eky'okubanza, ojwahukire emirimo...okunde okukora. Omukozi aryatunga. Baibuli neehabura ngu 'oryaguma orye eby'emikono yaawe ehendekyeire (Zab. 128:2), kandi ngu otarikukora atarya (1 Tes. 3:10). Okuriira akooya n'ekibi.
Kunda kukora, toryefuuza! Kora oine eki oyorekyereire. Gira ahi orikuteeba. Otafa kuza omu kishaayi okateera omupiira otaine hi orikugyenderera kuteeba! Orekye kuza omu nsi okatuura otaine ki oyorekyereire.
Ekya kabirii, ku oraacwemu eky'okukora, tandika! Abantu baingi nibaremwa kugira eki baakora ahabw'okutatandika. Tandika! Torikubaasa kugumizamu eki otatandikire; torikubaasa kuheza eki otatandikire. N'ahabw'ekyo, TANDIKA! Nangu n'orikwenda kukuha emikono nooba oine ahi waahika nari eki waahitsyaho.
Kankuhe eky'okureeberaho omu muringo gw'ekibuuzo: omuntu yaaza kukuha lift (kukuyamba aha rugyendo) naakushanga omu kitanda nari omu muhanda? Iwe nootandika orugyendo, okiba orurimu obundi oreeba owa motor car yaakuhika ati shutama nkuhitsye hariya.
Ka nkushabe ogundi, ku oraacwemu eky'okukora, waaheza kumanya ngu nikyo kandi kihikire, n'obu waakuba oteine bikoresa birikumara aha magingo ago, iwe tandika! Ku orikutandika, n'ekyamazima nibihika biguma, kwonka obwo omutwe nigukora munonga gukuha eky'okukora, kandi oreeba waagumizamu.
Ekya kashatu, oikirize kuhaburwa. 'Tintwarwa afa naazenga.' Nangu n'obundi bagira ngu 'Nyantagambirwa, Nyantahaburwa, na Nyantahurira emitwe yaabo bakagishanga omu kihandagazi.' Abayangire kuhanwa aha muheru batsigire ebyaganika. Shoma Enfumu 29:1. Oikirize kuhaburwa, okuhanwa, n'okuteisibwa, kandi otagangaara.
Manya bagira ngu 'Ngamba nyenka ahiisa mabi.' Obwengye tibuba bw'omwe. Hurira eki abandi barikugamba, reeru ocencure.
Ekya kana, omu okukora oijukye kubiikira nyencakare. Reka kurya mujuuju. Obe entegyeza-kariija, otaba engomba-bwariko. Buto ekorera bukuru. Omurimo gwa bukuru ti kukora - n'okushaasha omugongo, n'okukuuka amanyaanya, n'okuzimba ebigyere, n'okurwaraguzibwa, n'ebindi.
N'ahabw'ekyo, eki bukuru erikushaba ku oriba waahiriirwe okahikayo, n'okureebererwa. Gira eki waataho hati, eki orikumanya oti ku ndiba ntakiine maani, ndyeihamu akokurya n'akasente k'okumbangira. Kandi omu kutegyeza nyencakare, otabura kushomesa omwana waawe!
Buto yaawe ku erikukora n'amaani, bukuru yaawe terikubonabona. Buto ku eraabe etakozire, bukuru yaawe eryagwerwa akagwe! N'ahabw'ekyo, kora otaasye, obiikye, kandi 'obyare' nari 'obibe' (invest). Omushaara gw'orikutunga hati, ogukorese kuteeraho nyencakare entaasya. Manya obunaku obw'omushaara bugyerekirwe. Toriguma noogutunga! Beitu oramanyire ekitaanisa omworo n'omutungi? Omworo n'orikukorera sente, kandi omutungi n'ou sente zirikukorera.
Tata akaba angira ati emikono ekorer'enda, ku ofa egifumbata. Guma nookora kuhitsya obu orikuba ebitsya. Okukora nikukwombeka omubiri n'ebiteekateeko. Okukora nikukuheisa ekitiinisa. Okukora nikukuha okwekunda. Okukora nikukuha emikago y'abantu abaine omugasho nkaiwe. Okukora nikukuha okushemererwa. Okukora kwawe nikugasira abandi. Okukira byona nikushemeza Ruhanga.
Ekya kataano, omu kukora, nangu n'omu bindi byona, oteebwa kusiima Ruhanga. Oku ori kwonka n'ebi oine byona ni We. Abantu nibaha Ruhanga omu miringo etarikushushana, kandi n'omu bwire butarikushushana. Iwe ohurire eki Omwoyo araakworekye. Kwonka Ruhanga naatugambira kuha kimwe kya ikumi aha bitwine, omurundi gumwe omu mwaka, kukora omurimo gwe.
Ka nkuhe eky'okureeberaho aha ku waakutwaza. Ku orataasye Sh. 100, oiheho 10 ozihe Ruhanga, 10 ozibiikire nyencakare, reeru 80 zoona ezaatsigara, ozite aha mbariirira y'ebyetengo byawe n'eka yaawe. Orikuheereza Mukama taribura migisha ye! Naija akuzimuurira, kandi nangu arenzya!
Eky'aha muheru, eki oraaze kukora oreeba ngu nikishemeza Ruhanga, kandi nikigasira abantu be - naiwe orimu. Ekindi kibe kihikire kukorwa aha bunaku obwo, omu muringo ogwo, kandi ofeyo kukikora gye.
Ekirikutaanisa abakozi barungi n'ababi, n'akagambo ako GYE. Buri kacweka ku orikukakora gye, aha muheru byona nibiba gye.
Nkore n'ekahangare. Mukama akurinde, kandi akuhindure ow'omugasho!
Byahandikwa Byaruhanga owa Ndi Omunya Nkore facebook page
Obusingye!
Huumura Tuganiire
Abakatoriki (2) Africa (3) Agekibarukiraho (43) Akaruuru 2011 (1) Akaruuru 2021 (26) Amagara (2) Amaka (5) Amakuru (535) America (1) Ebaruha (8) Ebirango (8) Eizooba Eri (5) Ekyanga Kyawe (9) Enfumu (3) Enganda (2) Esente (1) Haaya (1) Obugabe (8) Obutare (4) Okwiruka (2) Omuntu Waawe (12) Omupiira (24) Omushaho (1) Puriyamare (2) Ruhuuta (18) Senyiga Ya Corona (29)