Kagiira Skills Development Center, Agriculture With New SkillsENYONYOOZI Y'ANKOLE: RT.REV.DR.FRED SHELDON MWESIGWA
Bishop Sheldon mwesigwa hamwe na omukyala weye
Nekya Andrew Ankole Reality Tv
843
Saande 2020-05-17
Emboozi y'okugumitsiriza hamwe n'okukora n'amaani.
Kurinogira ngu ebirooto by'obuto bikaba biri eby'okugyenderaho, Fred Sheldon Mwesigwa akabeire ari omunyamateeka w'amaani, atari Bishop.
Abazeire be bakamubatiza eiziina Sheldon omukweshaniriza n’omuramuzi w'amaani omwihanga, Sheldon owabireho omuramuzi wa Kooti y'eidaara ry'aheiguru omuri Masaka.
N'ebyobyoona bimwetoreire, Sheldon akakura nayenda kuba omunyamateeka kuhitsya obu Ruhanga yamwetsire kumuhereza omumwaka gwa 1986.
Mwesigwa Sheldon akazarwa ebiro 29-09 -1962 omuri Ruhoko, omu disiturikiti y’Ibanda kandi ni mutabani w'omugyenzi Rushota na Julia Kageye Atwoki.
Nyina akakoraho nk'omunansi omwirwariro rya Masaka Technical Institute kandi nawe Mwesigwa Sheldon yeija yatandika okushoma kwe ah'eishomero rya Kijjabwemi church of Uganda Primary school omuri Masaka ahiyahereize ekyamushanju omumwaaka gwa 1976.
Beitu obuyabeire ari omu kyamushanju, akafeerwa ishe omuri butandu y'amotoka kandi yeija yakuzibwa nyina.
Bwanyima y'omwaka, akegaita ahari Kako SSS omuri Masaka ahuyahereize siniya yakana omumwaka gwa 1980. Akeija yayegeita ahari Old Kampala SSS ahiyahereize siniya ya kataano ne yamukaaga omu mwaka gwa 1983.
Bwanyima y'okuheza okushoma haaya, ekiroto ky'okwegeita aheitendekyero eryaheiguru kikafa, bwanyima y'okuremererwa kwegeita aheitendekyero rya Makerere bwanyima y'okuremererwa kuhitsya obubonero 10.
Aha niho yayegeitiire aheitendekyero ry'abashomesa erya Kakoba omuri Mbarara.
Ari Kakoba akatandikaho eihurire eririkwetwa Siberian Observer bwanyima y'okuraara omunju eyabeire eri ahamuheru gw’eishomero nikwo kumuha ekikubyo Siberia”. Akabaho omuzaani w’omupiira hamwe na kaputeyini watiimu ya Kakoba.
Nagira ngu atakenzire kukunda n'okuhereza Ruhanga, akateganisiibwa ebintu beingi ahabw'okugira ngu akaba atakajunirwe.
Ababurizi nibagira ngu akaba ary'omutsigazi awabeire nayenda kushiisha ekanisa kwonka ahabwokugarurwamu amaani kuruga omubebembezi bamakanisa namunonga Bishop wa Ankole omugyenzi Amos Betungura, otararekireho mpaka obwiire ahibwahikire akajunwa ebiro 6-7-1986 ahakanisa ya St Paul’s church omuri Ibanda.
Omuri 1987, akashaba kweyongyerayo okushoma aha Bishop Tucker Theological College, obwahati erikumanywa nka Uganda Christian University kushoma obuburizi. Bwanyima akatunga diguri omumashomo g’ediini omu 1990 kandi omumwaaka nigwo gumwe yeija yajwaara obuburizi aha myaaka 26 yobukuru yonka.
Ah'eitendekyero eryo, akabaho mukuru w'ebyamahurire hamwe namukuru w'abahandiki omu katabo ka "The Bishop Tucker Theological Weekly Review". Akakoraho nk'omuhandiki w'oruterane rwabana b'ediini kumara emyaaka eshatu. Bwanyima yokuhindurwa omuburizi, akatumwa ah'eishomero ry'abeishiki erya Kibubura nkomuhwezi wa mukuru w'eishomero hamwe n'omuhwezi omuby'ediini. Mwesigwa akakora ahari Kibubura ahagati ya 1990 na 1994. Akashomesa orujungu, amashomo g'ediini, hamwe na general paper aheiguru y'okuba omuhwezi wa mukuru w'eishomero, hamwe nemirimo endiijo. Ahari Kibubura, niho yabugeine n'omukazi we, Ms. Alice Mwesigwa owabeire nakora nk'omwebembezi wa Scripture Union kandi Mwesigwa ary’omuhweezi w'ebyediini omwishomero.
Omubunaku obwo, Alice akaba nashoma dipuloma y'obushomesa kandi Mwesigwa akabayatungire diguri omubyediini kandi beija baguma nibashoma mpora mpora kandi obwahati boona beine za PhD.
Bwanyima y’omwaaka 1994, akatwarwa Ntare school nabwo nk'omuyambi wa mukuru w'eishomero hamwe n’omuhwezi w'ebyedini. Okuhindurwa kwe tikurashemeize baingi bwanyima ya baingi kugira ngu akaba atahikire kukora omw'eishomero nka Ntare. Eki tikirazibiire Mwesigwa kuhikyiiriza emirimo ye. Mukuru w'eishomero erya Ntare obwire obwo, Mr Kamuhanda akakwatanisa nawe, batyo bahindura Ntare eky'eri obwahati.
Obwiire bukye aherize kwegaita ahari Ntare school omu mwaka gwa 1994, eishomero rikakora kubi munonga ekyaretsire habaho ekiganiiro ahagati y'abeegi hamwe nabashomesa nkokubakubasa kutereeza ebyashobire.
Bwanyima yekiganiiro ekyo, abeegi bakatandikaho ekyamanyirwe nka UNEB campaign, kandi kuruga obwo Ntare tekarebaga nyima.
Ku yagiire Ntare, yayeyongera n'okushoma. Akeija yaza kushomera ah'eitendekyero erya Leeds university omuri Bungyereza kushoma diguri kuruga omumwaaka gwa 2000 okuhisya 2003, yatunga PhD kuruga omwitendekyero niryo rimwe. Ebi byoona bikamuhitsya aheiguru y'obuhanguzi omuby'okushoma omw'eihanga n'ebyobuburizi emyaaka yoona.
Omu 2005, akaruga Ntare, yaaza Uganda Christian University(UCU) Mukono nk'omushomesa, yabaho mukuru w'eitaagi ry'okushoma kandi obwahati ni mukuru w'entebe ya kanso y'eitendekyero.
Ahandikyire ebitabo bingi namunonga ebirikukwata ahabyediini hamwe n'emicwe.
Rev. Dr. Fred Sheldon Mwesigwa akatoranwa nka Bishop wa kataano ow’Ankore diocease obwo arikutoranwa enju ya ba Bishop b'ekanisa ya Uganda erikutshitama omuri Gulu omukeezi kwa 12- 2009 kandi akemekwa ebiro 18/7/2010. Akaza omumwanya gwa Bishop George Tibesigwa owahereize emyaka eshatu.
Ahiturikugambira ebi, Bp Dr.Fred Sheldon Mwesigwa naheereza nka mukuru w'eitendekyero erya Bishop Stuart University eyatandikyirweho diocese y’Ankole omu mwaaka gwa 2002 omuri Mbarara.
Omukazi we ni Dr. Alice Mwesigwa kandi nawe oyine Phd kandi beine abaana bana.
Alice nawe n'omushomesa. Omubwire bwe bwokuhumuraho, nakunda kushoma ebitabo hamwe nokureba omupiira.
Eishomo Eryarikukunda
Reka abo abaheirwe omugisha n'amaani g'okuguruka nk'empuungu bebembere, nyowe ninza kugyenda mpora kwonka nimanya ngu nanye ninzakuhikayo."
“Obugumisiriza bushashura, abantu nibarahuka ngu batungye ebintu, kwonka mpora mpora hamwe nokwetegyereza nikyirungi. Okutunga sente y'omugisha nikikora ebirikutangaaza. Nobaasa kutunga byoona ebyorukwenda naka sente kakye kasita kaba kari akayonjo kandi okatungyire omumihanda ehikire.”
Ekyarikukyirayo kwijjuka
“Eizooba erinajunwa omu mwaka gwa 1986 hamwe n'obu nashweera omu mwaaka gwa 1994 kandi nobunjwaara Phd.
Mukama ambereire omunyambabazi munonga." Byahandikwa Andrew owa Ankole Reality Facebook Page Omuvunuuzi ni: Herbert Mugume owa Agoweitu
Huumura Tuganiire
Abakatoriki (2) Africa (3) Agekibarukiraho (43) Akaruuru 2011 (1) Akaruuru 2021 (26) Amagara (2) Amaka (5) Amakuru (538) America (1) Ebaruha (8) Ebirango (8) Eizooba Eri (5) Ekyanga Kyawe (9) Enfumu (3) Enganda (2) Esente (1) Haaya (1) Obugabe (8) Obutare (4) Okwiruka (2) Omuntu Waawe (12) Omupiira (24) Omushaho (1) Puriyamare (2) Ruhuuta (18) Senyiga Ya Corona (29)