Kagiira Skills Development Center, Agriculture With New SkillsEMANZI YA NKORE : MUGABE ROBERT KAKYEBEZI
Ogu niwe Robert Kakyebezi
Nekya Andrew Ankole Reality Tv
1056
Orwakana 2020-05-21
(Emboozi ya reeba ahindugire)
Emboozi ya Kakyebezi netwijutsya enfumu emwe erikugira ngu "okuzarwa omuka y'enyoro tinshobi yaawe kwonka okufa Ori omwooro n'okusharamu kwaawe." Kakyebezi n'amazima akazarirwa omuka y'enyoro kwonka obwahati nuwe meeya wa Mbarara, tauni ya kabiri omw'ihanga.
Robert Mugabe Kakyebezi akazarirwa omu gomborora ya Kebisoni omuri Rukungiri omumwaka gwa 1974. Abazeire be ni George Kankunda na Joy Kankunda.
Aha myaka mito,abazeirebe bakafuruka baaza Kazo omukyaro Kantaganya omu gomborora eya Kanoni. Bakafuruka barikuronda beene baabo kandi barikwenda eitaka rihango ry'okuhingamu beitu bakahendera batungire akataka kakye.
Okwo niyo Kakyebezi yatandikiire eishomero ahari Kantaganya primary school, kandi eishomero niryo rimwe eriyahereizeho ekya mushanju. Akeija yaaza omu siniya ah'eishomero rya Makobore high school omuri Rukungiri beitu ahabwa sente kubura akarugayo ari omu siniya ya kashatu(S.3) obwo yaaza omw'eishomero erindi erya Nyakagyeme, siniya eyabeire eri ey'esente nkye kandi aho niho yahereize siniya yakana (S.4).
Akagumizamu yaaza omu haaya(A level) kandi yagishomera omuri Ntungamo omwishomero eririkumanywa Rugarama SSS. Akeija yayegeita ah'eitendekyero ry'abashomesa omuri Kabale yashoma dipuloma y'obushomesa ah'eidara rya siniya, akajwara omumwaka gwa 1998.
Omukushoma kwa Kakyebezi, obumwe akaba agyendesa ebigyere kuruga ah'eishomero ataaha omuka yaaba naza kuhumura ninga obumwe baaba bamubiingiire sente.
Emirundi mingi akaba ashaba obuyambi kuruga omu banyabuzaare, Ishe kuyabeire aremwa kumushashurira fiizi .
Kakyebezi akakigambaho eizooba rimwe obuyabeire ari omu rufu omuri Kazo, obuyasiimire Ishento orikumanywa nka Benson Tindimwebwa.
Akagira ngu omwami ogwo akamuheerezaho sente za turansipoti obuyamushangire omu muhanda nagyendesa ebigyere kuruga ah'eishomero nataaha kandi obwo akaba yagyenda orugyendo rurikwingana kilomita 20 ayekoreire enshaho, akaba yaruhire munonga.
Kakyebezi kuyaherize emishomo ye, akatandika kushomesa omumashomero gamwe omuri Nyabushozi nka Nyabushozi high school,Kashongi SSS, Kazo modern ahiyabeire nashomesa eishomo rye'byafaayo( history) aho niho Kakyebezi yakuziibwe akaba omuhwezi wa mukuru w'eishomero eryo. Akaba nakundwa munonga abeegi ahabwokuba akaba abashetsya kandi azaana nabo. Oihireho obushomesa, Kakyebezi akaba akora obwa sipiika aha mikoro, aho niho abantu batari bamwe na bamwe bamumanyiire.
Okwih'obwo Kakyebezi akatandika kukora eiziina.
Omukaruuru ka 2001, Kakyebezi akegeita ahari John Nasasira yamurondera akaruuru k'obwa Mp wa Kazo, omw'eishomero eri Kabazi yabeire naakoramu, Nasasira yamukunda yamuhindura omwe ahabarikukurira kampeyini ye omwishaza ryoona. Nasasira akeija yahasiinga akaruuru.
Omumwaka gwa 2002, Kakyebezi akaanjurwa owa omwami Tiguragara Matojo Salongo owabeire ari manegya wa Radio West kushabayo omurimo. Radio West ekaba emazire emyaka 3 etandikire kandi Hon John Nasasira akaba ari omwe ahabebembezi ba radio egyo, ekyayambire Kakyebezi kutunga omurimo gwobwa DJ.
Akatandika kukora aha radio omu puroguramu erikumanywa nka "Akagwe" kandi nikyigambwa ngu akakoragye puroguramu egi. Kutwagambireho na Tiguragara, akagira ngu radio ekaba ekiri nsya kandi na sente zikaba zikiri nkye kwonka Kakyebezi akagumisiriza yakora kandi yakoragye.
Akahanguraho n'ekirabo ky'okukoragye emirimo ye. Akakoragye obwo ari omugambirizi w'omupiira gw'empaka z'ekikopo ky'ensi yoona (world cup).
Kakyebezi akeija yaheebwa puroguramu ezindi aha radio nka, 'wagahuriire', owakutanga'heru, kandi akazikoragye munonga.
Kuyatungire sente, omumwaka gwa 2012 akegeita ah'eitendekyero rya Bishop Stuart University yashoma diguri erikumanywa nka "SWASA" eyiyajweire omumwaka gwa 2015 ebiro 16 okwezi kw'eikumi.
Tiguragara nagira ngu Kakyebezi n'omwe aha bakozi ba Radio West abatwiire munonga aha radio egyo, ngu kwonka Kakyebezi akaba atakworeka kabonero kokwejumbira omu by'obutegyeki nobu yabeire ari munywani w'abebembezi, abeingi, bakaba bamwehitsya munonga ahabw'okwenda ngu abagambehogye ahambeho za radio.
Kabagambe Patrick, owuyakozire nawe aha Radio West nagira ngu, Kakyebezi n'omuntu w'abantu kandi ngu nahikwa bur'omwe, kandi ngu nakira kuba ari omu myanya etari emwe n'emwe erikuteranirwamu abantu nka Rwampara pub, Coffee bar n'endiijo myanya mingi omuri Mbarara.
Omu mwaka gwa 2015, Kakyebezi akatangaaza bury'omwe obu yarangirira ku arikuza kwetsimba ahantebe yobwa meeya we tauni ya Mbarara, ekibeingi batweire nk'okuzaana kwe kwabutoosha. Akeija yatandika kuronda akaruuru obwo ateine na motoka nagyendesa ebigyere enju aha ndiijo. Akabonero ke kakaba kari etara, akaba nahayahayana n'omugeiga Wilson Tumwiine, owabeire ari omu ntebe yobwa meeya wa Mbarara tauni, n'abandi beingi. Kakyebezi bakaba nibamugaya ahabwokuba akaba ateine sente.
Akaruuru ka NRM kukateirwe akabasiinga n'oburuuru 11,991 kandi Wilson Tumwiine yaaba owa kabiri n'oburuuru 7,133, hajji Rashid Mukasa 5319, Katushabe Mary 2712, Sente Agaba 866, Apollo Kabila 346 na Stephen Mugisha 132.
Kakyebezi bwanyima yokuhangura, akagambaho n'abanyamahurire yagira ngu abaasize kusinga akaruuru ateine sente kwonka ahabwokuba n'omuntu w'abantu kandi n'amaani ga Ruhanga.
Akagira ngu abantu bakaba bamutweera amajuta ga motoka yokurondesa akaruuru. Omukaruuru ka boona, Kakyebezi akasiinga Stanley Katembeya owa FDC n'oburuuru 25,239 kandi Katembeya akeihayo 8125.
Kakyebezi omuncuroye nka meeya abaasize kukora ebintu bingi ebirimu okuta amataara aha mihanda omu tauni ya Mbarara, okuyoora kasasiro nokuyonja etauni, akombeka akatare k'omurembe aka Central market nebindi bingi.
Kakyebezi kuyakwatsibwe ofiisi y'obwa meeya akafuruka kuruga Kazo yaza Lyantonde omuri Kabula ahiyabaasize kugura eitaka erihango kandi akombekamu n'enju y'okutuuramu.
Omu maka ago niho yaziikire Ishe, omugyenzi George Kankunda owafiire omumwaka gwa 2016. Kakyebezi aine omukazi nabaana kandi obwahati nibatuura omu Kisenyi , Kakoba division omururembo Mbarara.
Byahandikwa Andrew owa Ankole Reality Tv.
Byavunurwa Tusiime Maria owa Agoweitu Huumura tugaaniire
Huumura Tuganiire
Abakatoriki (2) Africa (3) Agekibarukiraho (43) Akaruuru 2011 (1) Akaruuru 2021 (26) Amagara (2) Amaka (5) Amakuru (538) America (1) Ebaruha (8) Ebirango (8) Eizooba Eri (5) Ekyanga Kyawe (9) Enfumu (3) Enganda (2) Esente (1) Haaya (1) Obugabe (8) Obutare (4) Okwiruka (2) Omuntu Waawe (12) Omupiira (24) Omushaho (1) Puriyamare (2) Ruhuuta (18) Senyiga Ya Corona (29)