Ebirango Bikuru

   Kagiira Skills Development Center, Agriculture With New Skills
   Diary Farm Training By Kagiira Skills Development Center in conjunction with Eiraka Radio

OMURIMO GW'OMUNY'EISHENGYERO GUBA GUUHA?


Pariyamenti ya uganda
Nekya Nekya Google
385

Orwakashatu 2020-06-17

Omwe omu bashomesa bangye, Prof. Bernard Couty, ku yaabeire ayenda kushoboorora gye ekintu ngu abeegi tukikyenge kurungi, akaba atugambira oku kitari, kukira kushoboorora oku kiri.

Oburyo obu naanye nibwo ndakozese kushoboorora omurimo gw’eishengyero ry ’eihanga (paramenti) hamwe n’abajwekyerwa, tubeete ba MP.

Omurimo gwa MP, - Ti kwombeka mashomero -Ti kwombeka marwariro -Ti kwombeka ntindo - Ti kwombeka nguudo -Ti kugaba mbuzi, enkoko, nari empunu za NAADS - Ti kuheera baana fiizi -Ti kutimba maziba, enkiri ,ninga nayikondo - Ti kutwara batsigazi Iraq -Ti kugaba mirimo - Ti kwombeka maramizo - Ti kureeta ‘bajungu’ - Ti kuba minista - Ti ebyo byoona ebi baragaanisa barikuronda oburuuru, ninga ebi abantu bababuuza ngu ‘Otukoreire ki?” Omurimo gwa MP na paramenti ni gumwe guti: kukora amateeka n’ebiragiro ebi ihanga rigyenderaho, kujwekyera abantu hamwe n’okushwijuma emikorere ya gavumenti. Amateeka agakorwa paramenti gaba aga Uganda yoona.

Haza amateeka goona, gabagwa abakugu, abatari mu paramenti, reero ekitenso kireetwa minista ou kirikukwataho, ( ninga MP atari minister) omu paramenti ngu ba MP bakitenseho, bahinduremu ebirikweetaga kuhindurwa, bateereze ebindi, reero eiteeka rihinguzibwe, President ariteho omukono, ritandikye kukora. Haza kaingi, omu kuteesa aha iteeka, paramenti ekira kuba erimu ba MP batarengire 50, kureka ekitenso kyaba nikibakwataho: nk’eky’emishaara, emotoka, n’ebindi bya nyabeene nk’ebyo ahabw’obugwagye bwabo nk’abantu.

Okucondooza okwizire nikukorwa aha mikorere ya paramenti, kworekire ngu obwire obwingi, ba MP bakye, nibo batensa, barikuhagira nari okuhakanisa ebitenso omu paramenti.

MP kumara emyaka etaano yoona omu paramenti, atakagambayoga kigambo na kimwe!!!!! Reero nu abatuuragye, turekye kubuuza ba MP eki batukoreire, ninga bo kuturagaanisa eki baraatukorere. Ebyo byoona ti murimo gwabo. Hati kiri ahari itwe kusharamu: nitwetaaga ba MP 380 n’omushobyo kukora amateeka, kaingi agatensibwaho abatarengire 50? Okusharamu n’okwaitu: kugira MP omu ishengyero ninga kugira obuheereza. Manya omushaara gwa MP, enshako yaagwo, n’ebindi ebigyenderaho, buri kwezi, ni sente zikubaasisa buri kyanga ekigira MP kwehitsya ebi bakyenire, omu mwanya gw’omuntu omwe kubariira!! .

Haza ogwo mushaara niitwe tugushashura omu mishoro yaitu. Ekikye, buri kwezi, MP nitumushashura obukaikuru 25(miriyoni 25). Eishaza nka Bukanga, niribaasa kwombeka akarwariro n’eizaariro ahari buri muruka, buri gomborora egire emotoka z’okujuna abarembire(ambulance) ibiri, buri ishomero rigire enju z’abashomesa, buri ishomero rigire tanka y’amaizi,n’ebindi bingi omu sente ezishashurwa MP omwe omu myaka etaano.

Obushoboorozi buri omu bantu, nikwo batugira.

Reero nu baije batubuuze: miriyooni 103, tuziguremu motoka ya MP ninga ambulance y’okujuna abantu. Miriyooni 103 nizibaasa kugura ambulance 2 , ninga karakita 2 z’okuhinga. Reero nu obushoboorozi bwaba buri obwaitu, ba MP baije batubuuze: tugure motoka ya MP, ambulance 2 nari karakita 2? Hariho amahanga ahu obwa MP gutaba murimo gw’entuura, gw’okushashurwa omushaara. Amateeka gakorwa abantu bakye barikukora aha rurengo rwa Nyekundiire, nk’oku omuntu aheereza aha kakiiko k’ekereziya, ekanisa, omuzigiti, n’ebindi.

Noogira ngu ekyo tikikaabasika omuri Uganda? Katugire ngu buri disturikiti ibiri ezihereraine, zikiikirirwe omuntu omwe, nituba twafeerwa ki? Okwenda kuringaaniza abashaija n’abakazi, nitukora orukarara rwa disturikiti zoona.


Paramenti neegira ba MP 56, omu mwanya gwa 380 n’omushobyo. Tibo abo 50 abatensa, abandi bari ahabyabo, bagwejegyeire, ninga baroreriire kwonka?

Byahandikwa (Matsiko B D Kahunga)

Owahandiika ebi naakora na Peers Consult Ltd,

Kampala:
E-mail:peers120@yahoo.co.uk

Huumura Tuganiire

Abakatoriki (2) Africa (3) Agekibarukiraho (43) Akaruuru 2011 (1) Akaruuru 2021 (26) Amagara (2) Amaka (5) Amakuru (535) America (1) Ebaruha (8) Ebirango (8) Eizooba Eri (5) Ekyanga Kyawe (9) Enfumu (3) Enganda (2) Esente (1) Haaya (1) Obugabe (8) Obutare (4) Okwiruka (2) Omuntu Waawe (12) Omupiira (24) Omushaho (1) Puriyamare (2) Ruhuuta (18) Senyiga Ya Corona (29)