Kagiira Skills Development Center, Agriculture With New SkillsAkaunti ya @KagutaMuseveni eya Twitter neyekihama? - Entekateeka yaabakugu
YK Museveni
Nekya Agoweitu
675
Orwakashatu 2020-07-08
Abakurasi miriyoni 1.7 aha Twitter, hamwe na 700,000 aha Facebook, Purezidenti Yoweri Museveni burijo naakozeesa za akaunti zeeye za soso media okumanyisizaho abanya Uganda amakuru mingi. Kandi obwe akaunti egi n'emanywa nka akaunti y'omuntu buntu, okurugiriira okucwamu kwa kooti eyaheiguru.
Okurugiriira aha kooti yaaheiguru, purezidenti akakingira omunya Uganda orikushomera omu eitendekyero Rukuru rya Harvard, Hillary Innocent Taylor Seguya @HillaryTaylorVI, okumukuratira aha Twitter ahabwokuba akaunti ya Museveni @KagutaMuseveni neyeeye nk'omuntu kandi ngu aine okucwamu ekyarikwenda kugikozesa.
Okucwamu kwo'muramuzi Andrew Bashaija kukakuratira okugamba kwabantu beingi ngu Seguya aine orusa (right) kandi ngu purezidenti okukingiira nikimuzibira okuboona obutumwa kandi ngu naawe aine orusa okugamba ekyarikwenda. Nagira ngu tarikubaasa kureeba ninga kugarukamu okugamba kwa purezidenti aha Twitter.
Seguya tarikubaasa kukuratiira, okutaginga, okukunda ninga okugarukamu obutumwa okuruga ahari Twitter ya purezidenti, nari akaunti Twitter z'abamwe ahabakungu ba gavumenti, harimu nka eya Ofwono Opondo (@OfwonoOpondo), orikugambirira gavumenti, hamwe na Asan Kasingye (@Akasingye), akukuriira eby'obutegyeki omu porisi (political commissar).
Konka omuramuzi Bashaija akahabura Seguya ngu akuratire @PoliceUg, @StateHouseUg hamwe na @UgandaMediaCent yaaba naayeenda obutumwa bwona obuyakubeire n'aboona okuruga ahari purezidenti hamwe na porisi.
Abakugu omubyamahurire bo nibagiira ngu ebyokweherera by'omuntu nibigyenda n'omwanya gwarikuba aine omubantu. Kandi ngu, akaunti y'omuntu ya soso mediya n'obuyakuba eine eizina rye, terikubaasa kuba eyekihama yaaba ari omuntu w'aboona kandi aine na ofiisi y'abantu beingi.
William Tayebwa orikukurira ebyamahurire ahari Makerere Yunivasite, nagiira ngu omukungu wa gavumenti nka purezidenti ashemeirere kugira akaunti eri offisho hamwe n'eyekihama zirikukora ebintu bitarikushushana, kurugirira ekyarikwenda kugikozesa.
Nagira ngu omukozi wa gavumenti ahidaara ry'obwebembezi, naba atakiri owekihama, kureka obutumwa bwaba butateibweho aha nibaasa kuba nkeyekihama.
Juliet Nanfuka, omukugu omubya emitimbagano (digital) aha Collaboration on International ICT Policy for East and Southern Africa (CIPESA-Uganda) nagiira ngu omuntu yaaba nakozeesa akaunti ye, nikiba kiri aharibo okusharaho ahamuntu oubarikwenda abakuratire ninga obutabakuratira, n'amunonga omuntu yaabatwariza kubi, ngu konka nikirugirira ahakikura (nature) ky'obutumwa.
Nanfuka nagiira ngu akaunti '@KagutaMuseveni' erikuha obutumwa bwabantu beingi omuri Uganda eshemereire okuba nehikwa burimuntu, ngu kandi okukingira omuntu weena tikiri mumateeka ga Uganda. Nagira ngu hoonashi kwaba okukingira omuntu weena oragambe kubi, katarikukomora.
Dr. Fred Kakooza, omukugu omuri karimagezi (komputa) kandi omushomesa wamahurire ahari Makerere yunivasite nagiira ngu kikabeire kirungi okugira za akaunti ebiri, eyabantu boona hamwe n'eyekihama. Ekyokureeberaho, okugira akaunti ya purezidenti wa Uganda Museveni, hamwe na Yoweri K. Museveni.
Dr. George Lugalambi, omukugu ondijo wabyamahurire nagiira ngu purezidenti n'omukungu wabantu boona n'ahabwekyo bo abantu tibarikubura okugamba ebibarikwenda byoona ahari purezidenti.
Professor Frederic Jjuuko, orikukurira embeera zabeegi omwishomero ryamateeka ahitendekyero rya Uganda Martyrs yunivasite nagira ngu hariho entaniso aha muntu hamwe na offisi yaarimu. Nagiira ngu obutumwa bwaba nibukwata aha muntu, ashemereire kukozesa akaunti ye, tiyaaboona.
Omwaka ogu gurikutandika, purezidenti wa Kenya Uhuru Kenyatta akabinga akaunti ze zoona za soso mediya, ekyakuratire obutikirizingana ahari emwe omubutumwa bwe. Akakingaho Twitter ye eya '@UKenyatta' eyabeire eyine miriyoni ishatu (3m) z'abakurasi, obwire nibwo bumwe akakingaho akaunti ye ya Facebook. Atakazikingireho, akaba n'amanya nka purezidenti orikukirayo okukozesa Twitter munonga.
Purezidenti Paul Kagame owa Rwanda, ondijo orikukunda kukozesa za soso mediya munonga okumanyisa abantu be boona ebirikugyenda omumeisho. Akaunti ye eya '@PaulKagame' eyine miriyoni (1.9m) abarikumukurata. Aherize okuhabura minista wa South Africa weby'esente Tito Mboweni owabeire natinatinisa ngu naaza okuruga ahari Twitter ahabwabantu kumujuma. Okurabira aha Twitter, Kagame akagiira ngu Twitter teyine obuzibu bwona, ngu n'abantu abeine obuzibu.
Emyaaka eshaatu enyima, Federal Court eya New York City ekacwamu ngu Donald Trump, purezidenti wa America akaba n'ateganisa amateeka ga America okugyezaho kuzibira bamwe aba America okureeba twiti zeye aha '@realDonaldTrump.'
Okurugirira ahabaramuzi, za soso mediya n'ezabantu okubooneraho obutumwa, n'ahabwekyo Trump tiyakubeire nazibira abantu.
N'obuharabe hariho Twitter ya purezidenti wa America '@POTUS' kandi etwire n'ekozesebwa ba purezidenti abenyima boona. Trump n'akozeesa akaunti ye kandi erikukirayo ekumanywa omubantu abari kukunda kukozesa Twitter. Trump aine abakurasi barikurenga miriyoni 82 kandi obutumwa bwe nibukira kushomwa abantu beingi, omunsi yoona.
Nebya Ronard Shabomwe omuri Kampala.
Huumura Tuganiire
Abakatoriki (2) Africa (3) Agekibarukiraho (43) Akaruuru 2011 (1) Akaruuru 2021 (26) Amagara (2) Amaka (5) Amakuru (538) America (1) Ebaruha (8) Ebirango (8) Eizooba Eri (5) Ekyanga Kyawe (9) Enfumu (3) Enganda (2) Esente (1) Haaya (1) Obugabe (8) Obutare (4) Okwiruka (2) Omuntu Waawe (12) Omupiira (24) Omushaho (1) Puriyamare (2) Ruhuuta (18) Senyiga Ya Corona (29)