Kagiira Skills Development Center, Agriculture With New SkillsNIKIREETWAKI OKUSHEESHA BURI KAANYA?
Omwishiki
Nekya Byaruhanga
601
Orwakashatu 2020-08-05
#EbyAmagara
Noomanya ngu hariho abantu abamwe abarikwanga kunywa munonga amaizi nari chai ahabw'okutiina kugira enkari ya buri kaanya? Beitu kandi abamwe na baaba batanywaire munonga nooshanga enkari neebakwata buri kaanya, nangwa aba nibwo yaaheza kuruga kusheesha kwonka enkari egarukamu aho naaho kumukwata, akiza kuginyaara oshanga obundi yaija mpora nari heija enkari nkye munonga.
Omuntu weena orikuba naateganisibwa enkari buri kaanya arikuguma naayenda asheeshe buri kaanya eizooba ryona akahika kuburwa obusingye, nikaba kari akabonero akatari karungi emirundi mingi.
Obundi ekizibu eki nikibaho ah'abantu abamwe nk'abakazi b'enda, oshanga omukazi naaba naayenda kusheesha eshaaha yoona kwonka yaaheza kuzaara, ekizibu eki kihwaho kandi okusheeshasheesha nikuteebwa aha nshonga z'eby'amagara ezindi ezitari za buriijo omu magara g'omuntu. Ekizibu eki nikibaasa kuba akabonero ak'endwara nk'eya shukaari, endwara ezirikukwata akashekye akarikushohoza enkari (UTIs) nari ebizibu by'orushekye rw'enkari.
Okwenda kusheesha buri kaanya nikibaasa okushiisha oturo twawe munonga ahabw'okuguma nootsiimuka buri kaanya okusheesha.
Ekizibu ky'okusheeshasheesha abantu boona nk'abashaija abakazi hamwe n'abaana nibabaasa kukitunga, beitu nikiba ekya buriijo munonga ah'abantu abakuziremu omu myaka, abakazi abaine enda, nari abashaija abaine orushekye ruhagire nari ruzimbire.
EBI KUREETERA OMUNTU OKUSHEESHASHEESHA
Endwara ezirikukwata akashekye akarikushohoza enkari (UTIs): Endwara ezi nizo zirikukirayo okureetaho ekizibu eki. Omuntu yaatunga infekishoni, neetaaha omunda omu mubiri ereetera orushekye kuzimba, hamwe n'okuhurira obusaasi omu kahago okahurira waayetenga kusheesha.
Enda: Omukazi ku arikutwara enda, akahago k'enkari nikafunda omwana yaagyenda naakura omunda, oshanga omukazi naasheesha buri kaanya. Bwanyima y'okuzaara ekizibu eki nikihwaho kwonka kyagumizamu, nooba oine kureeba omushaho, nari okakora ekisasayizi kya Kegel eky'okuba nk'orikunyaara okasiba enkari okagaruka okagirekura ekirikukuhwera okugorora gye omwanya ogwo n'okurwanisa ebizibu by'akahago k'enkari, nk'enkari kukurabamu nari okutoonya.
Endwara ya shukaari: Okusheeshasheesha n'akabonero k'amaani ak'endwara ya shukaari. Aha omubiri gwawe niguba gutarikurinda shukaari eri omu shagama yaawe, ei ensigo zijunaanizibwaho okwozya. Hati ensigo zaaba nizigyegyena eshagama, nihazamu amaizi agandi againe kushohora omu mubiri. Mbwenu buri kuhurira nooyenda kunyaara, enkari egyo ekashohora, niyo ei orikukoma kugira empita okanywa amaizi otyo okahurira akahago kaijura.
Ebizibu by'orushekye rw'enkari: Orushekye oru nirukura omushaija yaagyenda naakura, kwonka nirubaasa kutunga obuzibu rwahanguha. Orushekye rwahanguha orushey ozi aha niruta oburemeezi aha nsigo, akahago n'ebindi kikureetera waayenda kusheesha buri kaanya.
Siturooka (stroke): Omuntu yaateerwa siturooka naaba atakiine bureeki ehami ey'okurinda enkari, oshanga yaaza kuza kusheesha enkari eba yaamurabiremu.
Abakazi kuba n'ebizimba omu nda, noshanga byata oburemeezi aha kahago k'enkari ekirikureetera kuguma nookwatwa enkari juba okaguma noosheeshasheesha.
Omuntu okuba naakozesa emibazi erikwiha omwonyo mwingi omu mubiri, hamwe n'amaizi kurabira omu nkari nayo neereetera omuntu kusheeshasheesha buri kaanya.
Okuzimba omu bicweka by'ekihama 'vaginitis', okujanjabwa n'enkora y'amashanyarazi 'radiation'.
Okunywa munonga amaarwa nari kaawa otairehon'okunywa munonga amaizi.
Endwara ya sickle cells. Egi neeshiisha enkora y'ensigo hamwe n'enkari, oshanga omuntu agiine naasheesha buri kaanya.
Obujanjabi: Omukazi oine enda, taine kufayo yaatunga obuzibu bw'okusheeshasheesha, ahabw'okuba n'ekya buriijo kwonka ekizibu eki kyagumizamu yaaheza kuzaara, aine kureeba omushaho.
Beitu okujanjaba ekizibu eki nikirugiirira aha nshonga erikuba ekireetsire. Oine kureeba omushaho okakyeberwa yaaba eri UTI, shukaari n'ebindi, nooba oine kutunga obujanjabi kandi waaba ori aha mibazi nk'eya puresha n'ebindi ekakureetera ekizibu eki, nabwo nooreeba omushaho akagira oku yaakuhinduriramu.
EKI OINE KUKORA OKURINDA EKIZIBU KY'OKUSHEESHASHEESHA
Kandi kuri nooba nookira kusheeshasheeha okareeba obubonero nk'orushwaija, okutanaka, okushaasha omugongo, okureeba eshagama omu nkari hamwe n okushohoza amaizi agatari ga buriijo omu bukazi nari omu bushaija na munonga omu bashaija abakuru, hamwe n'enkari eine erangi etari ya burijo nari enkari erikunuuka okundi ree ba omushaho.
Ndikuhendera omuntu tashemereire kusiba enkari ahabw'okuba naba nashiisha akahago ak'enkari. Shoma n'ebi;
https://www.facebook.com/1395354927386908/posts/2692447014344353/
Omushaija shoma n'ebi; https://www.facebook.com/1395354927386908/posts/2694750190780702/
Byahandikwa Byaruhanga owa Ndi Omunya Nkore.
Byaterezibwa Divasi owa Agoweitu
Huumura Tuganiire
Abakatoriki (2) Africa (3) Agekibarukiraho (43) Akaruuru 2011 (1) Akaruuru 2021 (26) Amagara (2) Amaka (5) Amakuru (535) America (1) Ebaruha (8) Ebirango (8) Eizooba Eri (5) Ekyanga Kyawe (9) Enfumu (3) Enganda (2) Esente (1) Haaya (1) Obugabe (8) Obutare (4) Okwiruka (2) Omuntu Waawe (12) Omupiira (24) Omushaho (1) Puriyamare (2) Ruhuuta (18) Senyiga Ya Corona (29)